(1976) Tracamundios, El echaor de sidra
¡¡Leñe!! - diréis - ¿Tamién ye un tracamundiu el echar la sidra?... ¿Nun tarás pasándote de llistu?...
Pos non, collacios, echar la sidra nun ye tracamundiu dalgún pero lo que ye el "echaor" yelo dafechu. El oficiu d'echaor de sidra ye un de los güaños de esa Asturies pretendiamente asturianista y que, de xuru, dexó selo hai abondu tiempu. El bebeor de sidra que, precisa que-i lo echen, tien-i apegu a lo asturiano de tala mena que'l cazaor a la ñatura.
Al cazaor gusten-i los animales, ye verdá, ¡pero desecaos! Cuandu va de caza y ve un raitán diz: ¡Qué guapu ye.. - Y, de refundiu, tira-i un tiru. Ansina ye'l asturianista de pacotilla; el llinguateru que se diz asturianu de pura cepa; que camienta ser dotor en bable y presume dello enos chigres; que-i presta la toná tradicional (anque enxamás lu oyereis canciar delguna); que presume de conocer Asturies del cabu al rabu (anque enxamás lu vereis entremecese cola xente les aldees); y que'm agostu avérase xunta'l "Pueblo de Asturias" pa dicer al alto la lleva aquello de "Asturias, que guapina eres...". Esi ye, de xuru, el asturianu que enventó el echaor, darreu que viste con corbatina y zapatos de charol; darreu que se fizo chupatines o llambeculos ena ceudá y anagora ye tou un siñor que tacha de aldeanu al hermanu de só que quedó curindo la casería y cóñase del. Esi, esi ye'l asturianu que enventó 'l echaor de sidra; que enventó 'l "Pueblo de Asturias"; que enventó lo de "Asturias es España y lo demás tierra conquistada"; que enventó lo de "Covadonga, cuna de España". Esi ye'l asturianu del grandonismu y de la babayura que fai d'Asturies un dogma y non una profesión de Fe. Esi ye'l asturianu que sopolexa ser más asturianu que naide, y ye quien pa engarrase per desmostralo y, dempués, tacha de separatistes, roxos o lo que cuadre (pa él ye too lo mesmo) a los que naguamos per llantar el BABLE y la cultura asturiana darreu enes escueles.
Pos bien, collacios, nun ye cuesa d'engarrase per causa'l nome: Si esi ye'l prototipu d'asturianu, yo soi otra cuesa, nun quieo selo; dame vergoña selo... Pa min, ser Asturianu ye tar xunciu fechu a unos vezos, una fala, un territoriu, una cultura, y faer profesión desa identidá. Los páxaros desecaos son plumes, ya nun son páxaros; les cultures desecaes son fetiches, ya nun son cultures.
Asturies nun pué ser Asturies perque haiga sío,
ena antigüedá un reinu endependiente, con gobiernu, economía y fala de só. Non; nun tien que ser ansina. Nun pué selo. Asturies será Asturies mentantu tenga motivos pa selo; ye dicer: Un autogobiernu, una autonomía y una fala de só, anagora, güei: non ayer nin mañana.
¿O ye que pué xustificar un nome la destribución, en eso que llamen provincies, de un estau (que non Nación o nacionalidá) que sacaren de les mangues los reis católicos?... De xuru que non. Pa desinar una provincia n'un mapa nun ye menester un nome: ye abondo un númberu. Si esta alpargata que pinten ente Galicia y Santander tién el nome de Asturies ye per daqué más: Ye perque tién delles carauterístiques que nun se puen desplicar con un númberu; darreu que tolos númberos son cualitativamente ximielgos. Y si ASTURIES desina daqué más que un cachu mapa, y desinalo güei, tién que tar xustificau esi ñomatu: pos nun ye razón que seya pa conservar el nome que desinaba daqué nel pasau. Ansina ye que hai dos ramales na más pa escoyer: I) O se mantienen dafechu toles carauterístiques que'l nome ASTURIES llevaba enrestráu nel pasáu o II) Tracamundiamos el ñomatu per otru nuevu que desplique lo que ye anguaño. Y, polo que dixi endenantes, lo más acorde conos tiempos sería pone-i un númberu, a nun ser que dudemos darreu d'aquel "refrán" que fala de "la unidá indixebrale de los homes y les tierres d'España"...
Y, tornando a lo que foi el aniciu desta espirica,
prúyeme anagora esmigayar les razones que m'enpobinaron a talantar que ye un vezu tracamundiau fae un oficiu de la costume de char la sidra; pero como, entós, espurriríase la espirica endemasiao, voi dexalo pa otru di, darreu que nesta fueya escriben otros collacios, y de too tién qu'haber na pumará'l Faedor...